歐美PMI數據回軟，喺週末環球央行舉行Jackson Hole會議前，歐洲交易員預期9月加息機會由60%降至40%，主要係歐洲商業活動連續3個月急速萎縮，德國10年債息由2.72%跌至2.52%，美國10年債息由4.36%回落至4.19%，債息回落係帶動美股隔晚回升原因。Nvidia業績遠超預期，盤後股價急升，納指期貨繼續向上，加上美匯指數回落，人民幣反彈至7.27水平，港股連續第三日反彈。
恒指高開146點，早段升幅曾收窄至99點，見17945半日低位，但仍守於周一至周二嘅下跌裂口之上，回補完裂口仲守得住，升幅又再度擴大，半日最多升343點，見18189高位，下半場有條件挑戰10天線(18251)，中午接近高位收18186，升341點；國指升136點，報6253；恒科指收4137，升128點。半日成交額518億元。
美股隔晚由科技股帶動向上，今日港股嘅大型科網股同樣係升市火車頭，美團(03690)今日收市後公布業績，半日升逾半成，騰訊(00200)、京東(09618)跟阿里(09988)全部升逾2%，加埋攜程(09961)同小米(01810)半日齊升4%，單係呢堆科技股，已合共為恒指貢獻172點，佔去大市過半升幅。
金融股個別發展，港交所(00388)之前跌得深，股價亦彈得多啲，半日反彈3%；大笨象(00005)半日彈0.3%；至慘係友邦(01299)，業績布後今日高開2.5%後，一度倒跌2%，半日跌幅收窄至0.5%，又係業績後見光死嘅例子。至於內銀跟內銀股反彈力度一般，建行(00939)公布業績中期竟然賺多咗3.4%，咁嘅環境下，呆壞帳竟然減少咗，神奇國度嘅國有銀行業績果然係神奇，股價半日無起跌，似乎市場對呢份業績都無乜反應，又唔係話懷疑嘅，係覺得too good to be true 啫。
安踏(02020)業績後被調高評級，股價昨日急升後，今日升勢持續，半日再升4.7%；其他內需股跟零售股亦齊反彈，閒閒地升接近4%或以上，跌咗咁多彈返啲都好合理。另一個較為突出嘅板塊係生科股，生物科技指數急升3.6%，藥明生物(02269)公布業績後股價升9.5%，係今日表現最好藍籌，但小心高追又仲伏；信達生物(01801)中期虧損明顯收窄，半日急升11.2%。
之前阿Man都有提過，香港上市嘅生科股，估值方確係平過美國貨好多，但波幅就相當嚇人，只能趁股價下跌同埋低位橫行時收集，高追嘅話，十追九伏，就算執到都未必夠買驚風散，呢個亦係本地生科股相對美股嘅同類股份出現較大折讓嘅原因。
港股反彈三日，能重上萬八點水平企穩，預期反彈可持續，至少先挑戰10日線，不過18200-300呢個位，剛好係5月31日見底後收市價，以及7月低位左右，跌穿咗就有機會由之前支持變為阻力，能否企穩帶動港股扭轉弱勢，仍有待觀察。
麥狄文
(徐狄怡‧證監會持牌人)
